Қазақстан Президенті ТШО бас директорын ІІ дәрежелі «Достық» орденімен марапаттады

Ақордада мұнай-газ саласының 125 жылдығына арналған салтанатты жиында Қазақстан Республикасының Президенті (ҚР) осы саланың бірқатар қызметкерлерін марапаттады. Марапатталғандардың қатарында «Теңізшевройл» ЖШС (ТШО) бас директоры Кевин Лайон да бар.
– Бәріңізге мәлім, қазақ мұнайы ғасырлар тоғысында алғаш рет Атырау аймағынан алынды. Содан бері бұл сала ел экономикасында айрықша рөл атқарып келеді. Халқымыз да мұнайды «қара алтын» деп атайды. Дүние жүзінің өркендеу жолы энергетика ресурстарымен тығыз байланысты болды. Ғылым мен технологияның дамуына қуат көздері ерекше ықпал етті. Осы үрдіске қазақ жеріндегі қара алтын өндірісі де мол үлес қосқаны сөзсіз, – деді Мемлекет басшысы.

Қасым-Жомарт Тоқаевтың өзінің ресми сөзінде, Chevron, ExxonMobil, CNPC, Eni, Shell, ЛУКОЙЛ, Total және Sinopeс сияқты жетекші әлемдік мұнай-газ корпорациялары елімізде аталған саланы дамытуға ерекше ықпал етіп отырғанына тоқталды.
– Теңіз, Қашаған, Қарашығанақ кен орындарын игеру, Каспий құбыр желісі консорциумы жобасын іске асыру – мемлекет пен инвесторлар арасындағы өзара тиімді ынтымақтастықтың жарқын үлгісі. Қазақстан бұл салада ашық және жан-жақты ойластырылған саясат жүргізу арқылы жаһандық экономикаға дендеп еніп, үлкен көлемде инвестиция тартып жатыр, – деді Президент.
Жиын соңында Президент мұнай-газ саласында өнімді еңбек етіп, еліміздің өркендеуіне зор үлес қосқан бірқатар азаматты мемлекеттік наградалармен марапаттады. ТШО бас директоры Кевин Лайон ІІ дәрежелі «Достық» орденімен марапатталды. Теңізшевройл бас директорының марапаты мұнай-газ саласындағы халықаралық ынтымақтастықтың маңыздылығын мойындауды білдіреді және ТШО-ның еліміздің экономикалық дамуындағы рөлін атап көрсетеді.
Ірі жобаларды сәтті жүзеге асырудың және озық технологияларды енгізудің нәтижесінде Теңізшевройл мұнай мен газды ішкі және халықаралық нарықтарға тұрақты жеткізуді қамтамасыз ете отырып, өндіріс көлемін арттыруды жалғастыруда.

 Өткен жылы шикі мұнай өндіру 28,9 миллион метрикалық тоннаны (230,6 миллион баррель) құрап, ал атмосфераға шығарындылардың жалпы қарқындылығы 2000 жылдан бергі ең төменгі деңгейге дейін төмендеді. Тек соңғы онжылдықта (2015-2024 жж.) ТШО өзінің негізгі өндірістік қызметіндегі қондырғылардың орташа сенімділігінің 98%-дан астамына қол жеткізіп, Қазақстан Республикасына сенімді кірісті қамтамасыз ете алды. 2023 жылы ТШО-ның барлық құрғақ газ сатылымы Қазақстанның ішкі нарығында жүзеге асырылды және компания жергілікті тұрғындар мен өнеркәсіп үшін сұйытылған көмірсутекті газының сенімді жеткізушісі болып қала берді.
2010-2021 жылдар аралығындағы тәуелсіз зерттеу нәтижелері бойынша ТШО-ның өндірістік қызметі жыл сайын елдің жалпы ішкі өнімінің шамамен 11%-ын қамтамасыз етті. ТШО Қазақстанның экономикалық ілгерілеуі мен энергетикалық қауіпсіздігін ілгерілетуде жетекші рөл атқарып келеді.

Анықтама үшін:

ІІ дәрежелі «Достық» орденімен халықтар арасындағы бейбітшілікті, достық пен ынтымақтастықты нығайтудағы елеулі қызметі, сондай-ақ қоғамдағы өзара келісімді сақтаудағы жемісті қызметі үшін марапатталады. Бұл награда Қазақстан Республикасының жоғары мемлекеттік наградаларының бірі болып табылады және ұлтаралық қатынастарды дамытуға және халықтар арасындағы достықты нығайтуға қосқан үлесін мойындауды білдіреді.