ӘЛЕМДІК ЭНЕРГЕТИКАДАҒЫ КӨШБАСШЫЛЫҚТЫҢ 30 ЖЫЛЫ: ҚАЗАҚСТАН KIOGE 2026 АЛАҢЫНДА ӘЛЕМДІК ЭНЕРГЕТИКАНЫҢ ЖАҢА ТАРАУЫН АШАДЫ
ӘЛЕМДІК ЭНЕРГЕТИКА ГЕОСАЯСИ ӨЗГЕРІСТЕРДІҢ, ЭНЕРГИЯ РЕСУРСТАРЫНА СҰРАНЫСТЫҢ АРТУЫНЫҢ, ТӨМЕН КӨМІРТЕКТІ ТЕХНОЛОГИЯЛАРДЫҢ ДАМУЫ МЕН ЦИФРЛАНДЫРУДЫҢ ЫҚПАЛЫМЕН АУҚЫМДЫ ТРАНСФОРМАЦИЯ КЕЗЕҢІН БАСТАН КЕШІРУДЕ.
Осындай жағдайда энергетика саласының тұрақты дамуын қамтамасыз етіп, сенімді серіктестік ұсына алатын мемлекеттердің рөлі ерекше маңызға ие. Қазақстан мұнай мен газдың мол қорына, мұнай-газ химиясын дамытуға, өңдеу қуаттарын жаңғыртуға, газ инфрақұрылымын кеңейтуге және қолайлы инвестициялық ахуал қалыптастыруға сүйене отырып, өз ұстанымын сенімді түрде нығайтып келеді.
KIOGE 2026 көрмесі
Осы тұрғыда 2026 жылы 30 қыркүйек пен 2 қазан аралығында Алматы қаласында өтетін 30-шы мерейтойлық Қазақстандық халықаралық «Мұнай және Газ» – KIOGE 2026 көрмесі мен конференциясы ерекше өзектілікке ие. Үш онжылдық ішінде KIOGE салалық көрмеден әлдеқайда ауқымды деңгейге көтеріліп, бүгінгі таңда мемлекеттік органдардың, ірі мұнай-газ операторларының, ұлттық компаниялардың, жабдық өндірушілердің, EPC-мердігерлердің, сервистік ұйымдардың, инвесторлардың, қаржы институттарының және сарапшылар қауымдастығының өкілдерін Қазақстан мен Орталық Азияның энергетика саласын дамытудың негізгі мәселелерін талқылау үшін біріктіретін халықаралық деңгейде мойындалған іскерлік алаңға айналды.
Қазіргі таңда көрмеге Әзербайжан, Ұлыбритания, Германия, Үндістан, Италия, Қазақстан, Қытай, Малайзия, Біріккен Араб Әмірліктері, Оман, Ресей, Румыния, Сауд Арабиясы, Сингапур және Түркияны қоса алғанда, 15 елден 235-тен астам компания қатысатындығын растады. Экспозицияның елеулі бөлігін Қазақстан нарығына алғаш рет шығатын компаниялар құрайды, бұл елдің инвестициялық әлеуетіне халықаралық қызығушылықтың артып келе жатқанын көрсетеді. Дебютанттар қатарында ATV Kazakhstan, Terranova Kazakhstan, Corrocoat Caspian, MIS Kazakhstan, Chemelex, Beruseal Caspian, «Регент KZ», «Энергоскан», «Этус» және басқа да компаниялар бар. Экспозиция мұнай-газ саласына арналған шешімдердің толық спектрін қамтиды: геологиялық барлау, бұрғылау және өндіруден бастап тасымалдау, өңдеу, мұнай-газ химиясы, өнеркәсіптік автоматтандыру, цифрлық технологиялар, өнеркәсіптік қауіпсіздік, экологиялық шешімдер, инженерлік жобалау және сервистік қызмет көрсетуге дейін.
KIOGE – Орталық Азия нарығына шығудың стратегиялық алаңы
KIOGE 2026 Қазақстанның Еуразиядағы жетекші энергетикалық орталықтардың бірі ретіндегі мәртебесін тағы да растайды және Орталық Азияда бизнесін дамытуға мүдделі АҚШ, Канада, Латын Америкасы, Еуропа, Азия-Тынық мұхиты өңірі, Таяу Шығыс және Африка елдерінің компаниялары үшін стратегиялық алаң болып табылады. Тәуелсіздік жылдары ішінде еліміздің мұнай-газ саласына 190 млрд АҚШ долларынан астам тікелей шетелдік инвестиция тартылды. Ал 2035 жылға дейін өндіру, газ өңдеу, мұнай-газ химиясы, мұнай өңдеу қуаттарын жаңғырту және инфрақұрылымды дамыту салаларында жалпы құны ондаған миллиард АҚШ долларын құрайтын ондаған ірі жобаны іске асыру жоспарланған.
Үш онжылдық ішінде Қазақстан Еуразиядағы жетекші энергетикалық орталықтардың біріне айналып, Теңіз, Қарашығанақ және Қашаған кен орындарын игеру бойынша аса ірі жобаларды жүзеге асырды, мұнай өңдеу саласын жаңғыртып, экспорттық инфрақұрылымды дамытты және әлемдік энергетика көшбасшыларымен ынтымақтастықты нығайтты.
Бүгінде Қазақстан көмірсутектерді терең өңдеуге және жоғары қосылған құны бар өнім өндіруге бағытталған жаңа өнеркәсіптік стратегияны жүйелі түрде іске асыруда. Негізгі жобалардың қатарында интеграцияланған газ-химия кешені, бутадиен мен ПЭТ өндіретін зауыттар, Қашағандағы жаңа газ өңдеу қуаттары, «Қаламқас-теңіз – Хазар» жобасы, Шымкент мұнай өңдеу зауытын кеңейту, жаңа мұнай өңдеу зауытын салу, сондай-ақ газ өңдеу және мұнай-химия саласындағы жаңа жобалар бар.
Газ саласын дамытуға ерекше назар аударылуда. Елде көмір химиясын дамытуға арналған заңнамалық база қалыптастырылып, газ-химия өнеркәсібін дамыту тұжырымдамасы жүзеге асырылуда. Shell, Eni, Chevron, CNPC және CNOOC сияқты жетекші халықаралық компаниялар газ жобаларына қатысу аясын кеңейтуде, ал алдағы он жыл ішінде мұнай өңдеу қуатын екі есеге арттыру жоспарланып отыр. Мұның барлығы Қазақстанның Орталық Азиядағы ең тартымды энергетикалық нарықтардың бірі ретіндегі позициясын нығайтады.
KIOGE 2026 конференциясы
Мерейтойлық KIOGE көрмесінің ажырамас бөлігі халықаралық конференция болады. Ол отыз жыл бойы Орталық Азияның мұнай-газ саласындағы ең беделді сараптамалық алаңдардың бірі ретінде қалыптасып келеді. Жыл сайын дәл осы жерде кәсіби күн тәртібі қалыптастырылып, энергетика саласының даму перспективалары талқыланады, одан әрі ынтымақтастық туралы шешімдер қабылданып, жаңа технологияларды енгізудің негізгі бағыттары айқындалады.
2026 жылы конференция «Мегажобалардан нарықтағы көшбасшылыққа: Қазақстан жаһандық энергетикалық теңгерімнің құрамдас бөлігі ретінде» атты бірыңғай тұжырымдама аясында өтеді. Ол мемлекеттік органдардың, ұлттық мұнай-газ компанияларының, халықаралық энергетикалық корпорациялардың, инвестициялық қауымдастықтың және салалық қауымдастықтардың жетекші өкілдерін біріктіреді. Бағдарламаға 12 тақырыптық сессия енгізілген, оларға әлемнің 25 елінен 700-ден астам делегат пен 85 спикер қатысады.
Конференцияны жаңа жаһандық энергетикалық архитектура қалыптасып жатқан жағдайда еліміздің стратегиялық ұстанымына арналған «Жаһандық интеграция: Қазақстанның жаңа энергетикалық тізбектердегі рөлі» атты пленарлық отырыс ашады. Пікірталастың негізгі тақырыптары халықаралық технологиялық әріптестікті дамыту, жеткізу тізбектерін әртараптандыру, стратегиялық маңызы бар минералдар, Азия, Таяу Шығыс және Еуропа елдерімен ынтымақтастықтың перспективалары, сондай-ақ Қазақстанның әлемдік энергетикалық тепе-теңдікті қамтамасыз етудегі рөлі болады.
Пленарлық пікірталасқа Қазақстан Республикасы Энергетика министрі Ерлан Ақкенженовтың, Түркия Республикасының Энергетика және табиғи ресурстар министрі Алпарслан Байрактардың, Газ экспорттаушы елдер форумының Бас хатшысы Филип Мшелбиланың, Дүниежүзілік мұнай кеңесінің (WPC Energy) президенті Педро Мирасаның, S&P Global Energy компаниясының мұнай нарықтарын талдау жөніндегі директоры Франческо Ди Сальвоның, сондай-ақ «ҚазМұнайГаз» ҰК» АҚ және «Теңізшевройл» ЖШС басшыларының қатысуы күтілуде.
KIOGE 2026 іскерлік бағдарламасында саланың технологиялық дамуына ерекше назар аударылған. «Интеллектуалды Upstream: сейсмикадан ұңғымаға дейін» атты стратегиялық сессиясы мен «Мұнай-газ саласында жасанды интеллектті енгізудің практикалық кейстері» шоукейсі геологиялық барлау мен өндіруді цифрландыруға, өндірістік процестерді автоматтандыруға, сондай-ақ жетекші мұнай-газ және технологиялық компаниялардың жасанды интеллектті тәжірибеде қолдануына арналады.
«Локализация 2.0: машина жасау, стандарттар, экспорт» стратегиялық сессиясы отандық мұнай-газ машина жасауын дамыту, өндірісті оқшаулау және экспорттық әлеует мәселелерін талқылауға арналған алаң болады. Ал «ESG және құқықтық реттеу – жаңа стандарттар: су, шығарындылар, тұрақтылық» панельдік сессиясында заманауи экологиялық талаптар, тұрақты қаржыландыру және нормативтік-құқықтық реттеуді жетілдіру мәселелері қарастырылады.
Алғаш рет KIOGE бағдарламасына атом энергетикасының даму перспективаларына, халықаралық ынтымақтастыққа және оның Қазақстанның ұзақ мерзімді энергетикалық қауіпсіздігін қамтамасыз етудегі рөліне арналған «Ұзақ мерзімді энергетикалық қауіпсіздік стратегиясындағы атом энергетикасы» атты панельдік сессия енгізілді.
Конференцияның екінші күні қатысушылар саланы одан әрі дамытудың негізгі бағыттарын талқылайды. «Газ және газ-химиясы: қосылған құнды қалыптастыру стратегиясы» атты стратегиялық сессия газ өңдеу және мұнай-газ химиясы жобаларын іске асыру, ішкі газ нарығын дамыту және экспорттық инфрақұрылымды кеңейту мәселелерін қамтиды. «Экспорттық логистика және маршруттар геосаясаты» стратегиялық сессиясы көлік дәліздерін дамытуға, мұнай мен газдың экспорттық бағыттарын әртараптандыруға және өзгеріп жатқан геосаяси жағдайда халықаралық энергетикалық ынтымақтастықты нығайтуға арналады.
Ауқымды көрме экспозициясы мен мазмұнды іскерлік бағдарламамен қатар, KIOGE дәстүрлі түрде қатысушыларға екіжақты келіссөздер өткізуге, жаңа тапсырыс берушілерді табуға, инновациялық әзірлемелерді таныстыруға, мемлекеттік органдардың, ұлттық операторлардың, халықаралық мұнай-газ компанияларының, EPC-мердігерлердің, инвестициялық қорлардың және салалық қауымдастықтардың өкілдерімен тікелей диалог орнатуға кең мүмкіндіктер ұсынады.
Мерейтойлық KIOGE – бұл Қазақстандағы ең ірі мұнай-газ көрмесінің тарихындағы айтулы күн ғана емес. Бұл – бүгінгі күні ұлттық экономиканың негізгі қозғаушы күштерінің бірі әрі жаһандық энергетикалық жүйенің маңызды құрамдас бөлігі болып қала беретін тұтас саланың отыз жылдық даму жолының көрінісі.
KIOGE 2026 көрмесіне Қазақстан Республикасы Энергетика министрлігі, Алматы қаласының әкімдігі, KAZENERGY қауымдастығы, «ҚазМұнайГаз» ҰК» АҚ, PSA, IMBC, Energy Monitor, KAZSERVICE Қазақстан мұнай сервистік компаниялар одағы және PETROCOUNCIL.KZ ресми қолдау көрсетеді.
Көрменің бас серіктесі – «Теңізшевройл» ЖШС.
Күміс серіктестер – Каспий Құбыр Консорциумы – Қ, CNPC, Solar Turbines, ABtec.
Қола серіктестер – AVC Group, Eurasian Machinery, Honeywell.
Іс-шараны Қазақстандық Iteca көрме компаниясы халықаралық серіктесі – ICA Events компаниялар тобымен бірлесіп ұйымдастырады.
